2Cor 1 | MMX | STEP | Nenia ne Pol, laradi vavang at ne Iesu Karisito; Moroa xa ga soxolik ka ia ri mo lugugu; ne Timoti, neton dik i paase aru box ia at na lovoang. Nia a sok na lovoang tinemi limixin mi nuunu at ne Moroa dom Korin, la tinemi bok limixin nuunu mik lok to at lengkot axap at lenep silok Grik.

2 Corinthians 1

Lavapaase Axasep

1 Nenia ne Pol, laradi vavang at ne Iesu Karisito; Moroa xa ga soxolik ka ia ri mo lugugu; ne Timoti, neton dik i paase aru box ia at na lovoang.

Nia a sok na lovoang tinemi limixin mi nuunu at ne Moroa dom Korin, la tinemi bok limixin nuunu mik lok to at lengkot axap at lenep silok Grik.

2 Letaba nabalamu mi lenmila rinemi boro at ne Moroa ne Temen nedik la Leeme Silok atdik ne Iesu Karisito.

Pol Ga Tong Aorong Ti Ne Moroa

3 Ata emi asu mi ne Moroa ne Temen Leeme Silok atdik ne Iesu Karisito; Temen dik kusuk mun lavasuun at labalamu, la neni lo Moroa at loklox amenemen. 4 Neni xusuk mun i lox amenemen nama at levenmumuat it pot parap nama, kusu nema bok maba epovo xusu mana lox amenemen nedi di ruuna levenmumuat kerepmo mi na lavapaase amenemen, nema maga ruuna ka i boro at ne Moroa. 5 Nema map kip buaang laxasongsongot keneng at lunuunu atnama saparap ne Karisito; kuren la keneng at ne Karisito nema ma ruuna xaka bok loklox amenemen silok at ne Moroa. 6 Mo do mana songot at lorooro axap atnama mumu nimi, naba lox avukat aleng mila losongsongot atnama naba lox asuusu loklox amenemen eburu mi lorooro rinimi; la mo do mana lok kaka loklox amenemen ukeneng ti lorooro atnama, na bok naba ravasu ngan loklox amenemen ti lok tooro nimi, mo loklox amenemen i su auru nimi xusu mina tu lolos tip kip mo levesongsongot ngan nema map kiv i. 7 Nema maklen tinotno i do nemi minaba tu lolos at lunuunu atnimi; atla mi vekip tangarang mi mo levesongsongot eburu minama la mira ruuna xaka bok loklox amenemen ngan nama.

8 Luvutnetak mi luvurinuk. Ma vara i xusu mina xasep ti levenmumuat maga ekip tangarang min to Asia. Mo levenmumuat maga xip tutu min ga silok aleng la ga mumuat aleng, la ma lixilik maga lok do mana doma abulubun ta at lorooro atnama. 9 I ruturun tinotno do maga nua i do nema mo mana met ta. Ketla ana lumumuat ga vot ti lox alolos nama xusu ma noxo nuunu at lolos axa atnama, ketla at ne Moroa xusuk mun, mo ik lox arooro limixin basinge lanmet. 10 Neni ga ranga asepsu nama basinge mo langas ti lanmet la neni nabak lox amisik box i. La ma lok li lodoxoma voovo mavana ren do neni mo nabang tanga axatu bok nama at levenmumuat i nemen tangais nama at na levenaleng i tu umelamgo atnama. 11 Nemi bok miba lok tooro nama mi levesingising; kuren la buaang bok atnemi diba tong aorong ti ne Moroa do neni ga vorang levesingising atnimi la ga lox aroo nama basinge lanmet.

Pol Ga Lox Ekun Lodoxoma Ren

12 Nema ma lok momo aleng, mila lodoxoma nunuan atnema i lox ase nema do, loklok atnema at na lavatbung menemen ngan maga ebibinat ka minemi, ga lok nunuan mene nga la kopmen taxakapmek teren ngan ne Moroa ga lok tooro nama min. Kuren mun maga mumu asu letaba nabalamu at ne Moroa la kopmen do at lakleklen maut at laradi at na laxangka. 13 Ma malagan na lovoang tinimi mi levelinga i xasep aleng la kopmen tevelinga ren go ik lox alipe. La nia am domam poovo i do mibaklen axasep nunuan ba mo levelinga, 14 nemi mi goxo xasep nunuan teren; kuren la nemi minaba lok momo aleng mumu nama kerekngan nema maba lok momo mumu nimi ap mo laaleng Leeme Silok ne Iesu namlong teren.

15 Nia agaraklen tinotno vam i na, kuren la nia aga doxoma i do anat pas avot be udom atnimi xusu miba lok ka amu manga leveloklox anarong. 16 Aga doma gagas i xusu at lavatpas tarak uto Masadonia la lomlong bok tarak, aba vot pasa be nimi xusu anaba lok ka teveloklok tooro me dom atnimi ti lavatpas tarak uto Judaia. 17 Ise nenia aga soxovo li i na, aga soxovo li i mi luruturun, nia xopmen agoxo soxovo li mene i mi loklok at na lavatbung menemen la ana sisiam gamasa mene do tuturun la kopmen.

18 Levelinga at ne Moroa i paase asu i, i ruturun la kerepmo levelinga rak tinimi xopmen loxolinga mene do tuturun kopla kopmen. 19 I lok ngan ne Iesu Karisito, Nitna ne Moroa, mo nema mi ne Sailas la ne Timoti maga vavang min kantubu atnimi, neni xopmen na voovo ela mi levelinga ren, ketla kusuk mun neni i paase ruturun. 20 I ngan do buaang laxampapaase alii at ne Moroa, ne Iesu ga lox asorun i. Kuren la ne Iesu Karisito ni luruturun la ma vaase asu i ri lox asuusu lisisixam at ne Moroa. 21 Moroa xa ik lox alolos nema eburu minimi xusu dik ataba tu atmatkun keneng at ne Iesu Karisito. Neni ga soxolik ka dik, 22 la neni ga lok katling dik do ateren akmokso la ga lok li Loroonan Kaala ren keneng atdik ngan lampinebeng.

23 A sing ne Moroa xusu na vaase aru ia at na levelinga ana vaase i, la neni ikleklen axap keneng at lorooro rak. Nia a goxopara na lok li lumumuat atnimi; ni lavasuun teren la nia goxot pas udom Korin. 24 Ma xopara i do mana pu soso nimi ri levelinga salai miba nuunu ren, mila mi tu lolos pam at lunuunu atnimi. Ketla ma gugu xantubu atnimi xusu miba ruuna ka lomomo.